Qırımda qırımtatar maarifçisi Gasprinskiyniñ doğğan kününi qayd eteler

Qırımtatar maarifçisi, yazıcı, naşiri ve birinci türk tilli «Terciman» gazetasınıñ esasçısı İsmail Gasprinskiy doğğanınıñ 163 yıllığına bağışlanğan tantanalı tedbirler keçirüv çerçivesinde Aqmescitte onıñ eykeline tantanalı sürette çeçekler qoyuldı. Azatlıq Radiosınıñ mühbiri bildire ki, Salğır özeni yalısında İsmail Gasprinskiy eykeli yanında onlarnen adamlar toplaştı. Böyle bir aktsiya on üçünci kere ötkerile, dep ayta tedbir teşkilâtçıları. İsmail Gasprinskiyniñ adınen islâm Şarqındaki halqlarnıñ maarifçi areketiniñ peyda oluvı ve inkişafı bağlıdır. Usul-i Cedid (yañı, tasilniñ zemaneviy bir usulıdır) bir çoq musulman memleketlerinde başlanğıç tasilniñ emiyeti ve strukturasını bayağı deñiştirdi. Gasprinskiy Qırım türklerinde bir çoq publitsistik ve edebiy üslüplerniñ esasçısı olmaqnen beraber, diger türk halqlarğa da bu saada hızmet etip kelgen.